Бу сафар нозик муносабатларга янгилик киритиш ёхуд жуфтимизнинг кўнглини забт этишда асқотадиган усуллар ҳақида сирлашмаймиз. Таажжубланаяпсизми? Эътироз билдиришга шошилманг-да, яхшиси танлаган мавзумизга диққат қилинг. Зеро, бугунги суҳбатимиз жинсий яқинлик борасида йўл қўйиладиган хатолар ва эҳтиросларнинг сўнишига олиб келувчи ҳолатлар тўғрисида бўлади.
Мутахассис – андролог-сексопатолог Дилмурод ЭРГАШЕВ.
Бир хиллик
Тасаввур қилинг, яқинлик вақти ҳеч қандай ҳиссиётлар юзага келмади. Хўш, бунга ким айбдор? «Албатта, турмуш ўртоғим, ахир мен нима ҳам қилолардим?». Агар шу баҳона билан ўзингизни овутаётган бўлсангиз, билингки бу сизнинг биринчи ва энг катта хатонгиз. Муносабатларингиздаги бир хиллик эҳтиросларнинг сўнишига олиб келаяпти. Эрингизга турланиб юришингиз ёқадими, демак, шахсий ҳудудда ҳам ана шу жараёнга эътибор беришни унутманг.
«Бир дақиқа, ойим қўнғироқ қилаётганди...»
Ҳар қандай масалада қатъиятли эркак, нозик муносабатларга келганда ўта таъсирчан бўлиши ҳеч гап эмас. Айниқса, висол онларига ишора қилсаю, кутилмаган қўнғироқ ёки бирор бир сериал билан диққатини бўлсангиз, қўпол муомаласини кутаверинг. Худбинлиги уйғонсаю, эътиборини ҳам сиздан қизғона бошлайди. Ахир сиз уни рад этдингиз.
Жуфтингизнинг кайфиятини билдингизми, демак, ҳар қандай қўниғироқлару кино ва сериалларни унутинг-да, бор диққатингизни унга қаратинг.
Сохта туйғулар...
Турмуш ўртоғимга манзур келай, дея яқинлик вақти аслингиздек кўринмайсиз, ҳиссиётларингиз алдамчи эканлигини боплаб яширасиз. Аммо бу қачонгача давом этади? Аввалига билинмаслиги мумкин, бироқ вақт ўтгани сайин ўзингиз ҳам зерика бошлайсиз. Сиздаги ўзгаришлар жуфтингизнинг ҳам эътиборидан четда қолмайди. Кейин... кейин ўзаро тушунмовчиликлар, гина–кудурат бошланиши мумкин. Англаганингиздек, айнан сохта муносабатингиз хатонингиз чуқурлашишига асос бўлаяпти. Нима қиласиз? Жинсий муносабатларда нимани истаяпсиз, қай ҳолатлар сизга маъқул эмас ёки аксинча, умр йўлдошингиз билан суҳбатлашинг. Ажабланманг, эр–хотин учун бунинг уятли жойи йўқ. Аксинча баъзида жуда аҳамиятли бўлиши ҳам мумкин.
Бўрттириш
Нозик муносабатларга тайёргарлик кўринг деб кўп гапирсак-да, аммо ортиқча ҳашамдан тийилишингизни сўрардик. Аксарият эркаклар иштаҳа билан бўялган лаблару, ифори димоғни заҳарловчи атирларни хушлашмайди. Ёримни маҳлиё этаман деб оро беришни ошириб юборсангиз, кутилганининг акси бўлиши ҳам ҳеч гап эмас. Фаҳмлаганингиздек, озгинаю созгина бўлгани дуруст.
Таққослаш
Жуфтингиз бир пайтлар хаёл қилган оқ отли шахзодангизга ўхшамаслиги мумкин, ахир идеал инсоннинг ўзи йўқ аслида. Бироқ шуни деб нозик муносабатларингиз совуши мумкин-да. Яқинлик вақти унинг хатти-ҳаракатини рағбатлантирмайсиз, қисиниб-қимтиниб ўзингизни гўё шу ишни қилишга мажбурдек тутасиз. Турмуш ўртоғингизнинг синчков нигоҳи эса сиздаги ўзгаришларни пайқамай қолмайди. «Хаёлинг қаерда?» деган савол янграши хамон хушёр тортмасангиз, кейин аттанг қилишингиз мумкин. Майлига, у ширин сўз айтмасин, «Яккаю ягонамсан» дея кўкларга кўтармасин, аммо севиши учун имкон беринг. Шунда кўрасиз, севилиш нақадар бахт эканини.
Режаларни чиппакка чиқаради:
– Жинсий яқинлик олдидан қаттиқ қовурилган, дуккакли ўсимликлардан тайёрланган таом ва егуликларни истеъмол қилиш ҳамда газланган ичимликларни ичиш ҳиссиётларнинг юзага чиқишига тўсқинлик қилади. Соддароқ айтганда тўқ қоринга муҳаббат аланга олмайди;
–Айни пайтда тинчлантирувчи, антибиотик ва бош мия фаолиятига таъсир кўрсатувчи дори воситаларини қабул қилаётган бўлсангиз, бу ҳақда жуфтингизни огоҳлантириб қўйинг. Ёки у муолажа олаётганда яқинлик масаласида шошилмаганингиз яхши. Ҳар иккала ҳолатда ҳам препаратлар жинсий хоҳишнинг йўқолишига дахл қилиши мумкин.
